پروفیشن ٹیسٹ پروگرام کے دوسرے مرحلے کا آغاز، چھ نئے پیشے شامل
سعودی وزارت افرادی قوت و سماجی بہبود نے غیر ملکی کارکنان کے پروفیشن ٹیسٹ پروگرام کے دوسرا مرحلے کا آغاز کر دیا ہے، اور اس میں مزید چھ پیشوں کو شامل کر لیا گیا ہے۔ دوسرے مرحلے کا اطلاق ایسے بڑے نجی اداروں پر ہوگا جہاں 500 سے 2999 تک ملازم ہوں۔
وزارت افرادی قوت ایک ہزار سے زیادہ پیشوں کو لازمی پروفیشنل ٹیسٹ پروگرام میں شامل کرنے کا عزم کیے ہوئے ہے۔
پروفیشنل ٹیسٹ پروگرام کے ڈائریکٹر انجینئر سعد العقیل کا کہنا ہے کہ ’سعودی لیبر مارکیٹ میں ہنرمندوں کی کارکردگی کا معیار بلند کرنے اور مختلف پیشوں سے منسلک کارکنان کی صلاحیتوں سے منظم شکل میں فائدہ اٹھانے کے لیے پروفیشنل ٹیسٹ پروگرام نافذ کیا گیا ہے۔‘
سعد العقیل نے مزید کہا کہ’ اب تک 1999 پیشوں میں سے 205 پیشے پروگرام کا حصہ بنائے جاچکے ہیں۔‘
انہوں نے بتایا کہ ’پروفیشنل ٹیسٹ پروگرام مملکت کے تمام اداروں میں تدریجی طور پر نافذ کیا جائے گا۔‘
’پہلا مرحلہ جولائی 2021 میں تین ہزار اور اس سے زیادہ ملازمین والی کمپنیوں سے شروع کیا گیا اور یکم ستمبر سے اس کے دوسرے مرحلے کا آغاز کیا گیا ہے۔‘
یکم ستمبر سے جن چھ پیشوں کو شامل کیا گیا ہے ان میں، ایئرکنڈیشن معلم، ویلڈر، کارپینٹر، گاڑیوں کے مکینک، گاڑیوں کے الیکٹریشن اور پینٹر بھی پروفیشن ٹیسٹ پروگرام کا حصہ بن گئے ہیں۔
یاد رہے کہ پروفیشن ٹیسٹ پروگرام کا نفاذ دو جہتوں میں کیا جا رہا ہے۔
پہلے ہنرمندوں کا پروفیشن ٹیسٹ ان کے اپنے ملک میں انٹرنیشنل ٹیسٹ سینٹرز کے تعاون سے لیا جاتا ہے جبکہ دوسرا ٹیسٹ ہنرمند کے مملکت پہنچنے پر ملکی ٹیسٹ سینٹرز کے تعاون سے لیا جاتا ہے۔
⚠️ اس خبر کو شیئر کریں، شکریہ
0 تبصرے